မကွေးမြို့မှာ ဆရာဝန်မကြီးတယောက် ဆေးခန်းအတွင်း ဓားထိုးခံရပြီး သေဆုံး

နိုဝင်ဘာ ၂၂ – ၂၀၂၄
SS (VOM)

မကွေးတိုင်း၊ မကွေးမြို့မှာ မနေ့ နိုဝင်ဘာ ၂၁ ရက်၊ ညနေပိုင်းက ဆရာဝန်မကြီးတယောက် ဆေးခန်းအတွင်း ဓားထိုးခံရပြီး သေဆုံးမှု ဖြစ်ပွားခဲ့တယ်လို့ ဒေသခံတွေဆီက သိရပါတယ်။

အဲဒီဖြစ်စဉ်ဟာ မကွေးမြို့၊ ပြည်တော်သာလမ်းနဲ့ ဆေးရုံလမ်းထောင့်အနီးက ဆေးရုံလမ်းရဲ့ အနောက်ဘက်မှာရှိတဲ့ “စိမ်း” ဆေးခန်းမှာ မနေ့ ညနေ ၅ နာရီကျော်ဝန်းကျင်က ဖြစ်ပွားခဲ့တာဖြစ်ပြီး အသက် ၆၅ နှစ်ဝန်းကျင်အရွယ် ဆရာဝန်မကြီးတယောက် သေဆုံးခဲ့တယ်လို့ သိရပါတယ်။

“ဆရာမကြီးက အသပြာဆရာမကြီး မဟုတ်ဘူး။ သူက လူနာတိုင်းကို ပိုက်ဆံယူပြီး ကုပေးတာမဟုတ်ဘူး။ မရှိတဲ့သူတွေကို စေတနာနဲ့ အခမဲ့ ကုပေးနေတာ။ ပြစ်မှုကျူးလွန်တဲ့သူက မနက်ပိုင်းတခေါက် ဆေးခန်းလာပြသေးတယ်ပြောတယ်။ ပိုက်ဆံမပါလာတော့ ဆရာဝန်မကြီးက ရတယ် မပေးနဲ့လို့ ပြောတာကို သူက ညနေလာပြန်ပေးမယ်လို့ ပြောတယ်တဲ့။ ညနေ တခေါက်ပြန်လာတဲ့အချိန်မှာ အခင်းဖြစ်တာပေါ့။ ဓားနဲ့ ထိုးလိုက်တာ ချက်ကောင်းကို တချက်တည်းနဲ့ ထိသွားတယ်၊ ၄ လက်မလောက် နက်တယ်ပြောတယ်။ တချို့ကတော့ ဆရာမကြီးရဲ့ ပိုက်ဆံအိတ်ကို ဆွဲတယ်လည်းပြောတယ်။ တချို့ကတော့ ဖုန်းလုတယ်ပြောတယ်။ ဘယ်ဟာအမှန်လဲဆိုတာတော့ အတိအကျ ပြောလို့မရသေးဘူး” လို့ ဒေသခံတယောက်က ပြောပါတယ်။

ဓားနဲ့ထိုးခံရတဲ့ ဆရာဝန်မကြီးဟာ ကာလသားရောဂါ တိုက်ဖျက်ရေး ဆရာဝန်ကြီးတယောက် ဖြစ်တယ်လို့ သိရပြီး လည်ပင်းနဲ့ ဗိုက် ထိုးသွင်းဒဏ်ရာတွေနဲ့ သေဆုံးသွားခဲ့တာဖြစ်တယ်လို့ သိရပါတယ်။

“အဲဒီဆေးခန်းမှာ ထိုင်ပေးနေတဲ့ သူ့ရဲ့ PA အစ်မကြီးတယောက် ရှိတယ်။ သူ့ကိုလည်း ဓားနဲ့ ထိုးသွားတယ်။ သူကတော့ ဒဏ်ရာ ရသွားတယ်။ သူက ဓားနဲ့ထိုးတဲ့သူကို ဝင်လုံးတာ။ အဲဒီတော့ သူ့ကိုပါ ဓားနဲ့ထိုးလိုက်တော့ ဆရာမကြီးက ကယ်ကြပါဦး ဆိုပြီး ဘေးပတ်ဝန်းကျင်ကို အကူအညီတောင်းတာ။ ဆရာမကြီးက အဲဒီအချိန်ထိ သတိလည်း ကောင်းသေးတယ်။ ဒါပေမယ့် သွေးတွေတအားထွက်နေပြီ” လို့ သူက ပြောပါတယ်။

ပြစ်မှု ကျူးလွန်သူဟာ အသက် ၂၉ နှစ်ဝန်းကျင်အရွယ် အမျိုးသားတယောက်ဖြစ်ပြီး ဆေးခန်းရှေ့မှာ ရပ်ထားတဲ့ သူ့ရဲ့ဆိုင်ကယ်ကို သော့ဖွင့်ဖို့လုပ်ပြီးမှ ခြေလျင်ထွက်ပြေးတာမှာ အနီးဝန်းကျင်ကလူတွေ ဝိုင်းဝန်းဖမ်းပြီး ဖမ်းမိခဲ့တာဖြစ်ကာ လက်ရှိမှာ ပြစ်မှုကျူးလွန်သူကို မကွေးမြို့မရဲစခန်းမှာ ဖမ်းဆီးထိန်းသိမ်းထားတယ်လို့ သိရပါတယ်။

မကွေးမြို့ပေါ်မှာ ဓားထိုးမှုတွေ မကြာခဏဆိုသလို ဖြစ်ပွားနေတာမှာ ပြီးခဲ့တဲ့ ဧပြီလ ၁၈ ရက်နေ့ကလည်း မကွေးမြို့နယ်၊ ကျွဲခြံကျေးရွာမှာ အမျိုးသားတယောက် ဓားခုတ်ခံရပြီး သေဆုံးခဲ့ကာ အမျိုးသမီး နှစ်ယောက် ဒဏ်ရာရရှိခဲ့တယ်လို့ သိရပါတယ်။

အဲဒီလိုပဲ ဧပြီ ၁၆ ရက် (သင်္ကြန်အတက်နေ့) ကလည်း မကွေးမြို့၊ ကမ်းနားလမ်း၊ ဘီလူးညီနောင် နတ်ကွင်းနားမှာရှိတဲ့ ရေကစားမဏ္ဍပ်နားမှာ ဓားထိုးမှု ဖြစ်ပွားခဲ့ပြီး အမျိုးသား တယောက် သေဆုံးခဲ့ကာ နောက်ထပ် အမျိုးသားတယောက်ကတော့ ဒဏ်ရာ ရရှိခဲ့တယ်လို့ သိရပါတယ်။

Photo:CJ